هابي فلانتينز داي:D

*انتي اسمك ايه ياحلوه انتي
-مش هقولك طبعًا
*ليه بس؟
-هو بيبدأ بالدال لو شاطره قولي
*داليا..داليدا..دانا..دلددوله طيب..؟
-هي هي هي ندى يا ذكيه أصلاً
*لأ فعلا بيبدأ بالدال ده حتى أكتر اسم بيبدأ بالدال في الدنيا
طب ما تيجي تلعبي معانا بقى
-لأاااا
ودفعه للخلف كانت جديره بأن تجلعها لا تكرر المحاولة


طب استنو استنو أنا عارفه البنوته دي
*ازيك ازيك مش انتي صفاء برضه
-ها ها ها صفاء يا خبر
وشلوت جميل فالقدم جلعها تخاف صفيه طوال اليوم:D


طب هنعمل إيه يا بنات
هنكلمهم ازاي
دول كارهينا اوي
وصاحبة الدار قالت لنا مش نجيب لعب لهم


تخبر المشرفه إحداهن يا عصمت تعالي سلمي على طنطات
وهي تمسح عينيها في طريقها الي الحمام
-مين دول أصلاً؟:D


تجمعت صفاء وندى وأخذوا يتهامسون بصوت منخفض
ثم فجأه
-احنا أصلا على فكره مش بنحب حد غير طنط اللي لابسه اورانج
أدور بعيني فالمجموعه على تلك المحظوظه بنت اللذينه اللي حبوها القمرات دول

أجد العيون متجهة لي

إيه ده طلعت أنا .. الحمد لله إني لبست إورانج النهرده إحمدك يارب:D

تشجعت قليلاً
ولأنني عبقريه أولاً
و بخاف ثانياً
وكنت عارفه اني هبقى ملبوخه حتى مع حبة عيال ثالثاً
جبت معايا أقلام رصاص وألوان
ومجموعه عمل فقاقيع صابون
بألوان قوس قزح

بمجرد ما طلعتها
هيصه وهيصه وهيصه
واللي فالحمام خرجوا واللي بياكل ساب الأكل واللي بيكرهونا اتجمعوا
اخذنا نجري خلف فقاقيع الصابون فالدار
كانت أكبرنا 24 سنه
ولكنها حقا كانت تبدو أصغر عشر سنوات وهي تركض حلف الفقاقيع وتحمل الفتيات ليطالوها
شاعت البهجه فجأه بمجرد أن علا صوت ضحكاتهم المندفعه

أتت صفيه وندى امسكتا بيدي وصعدنا إلى دور الالعاب
*يلا نتعرف بجد بقى اسمكو ايه
-أنا ندى
وعشان احنا عندنا اتنين ندى فأنا اسمي بندقه
*الله حلوه لايق عليكي شكلك تتاكلي كده
واتي يا صفيه
اسمك ايه؟
-اسمي صفيه
*بس؟
دون ان تنظر بعيني
-صفيه احمد ابراهيم
*مش قصدي يا عبيطه انتي ..تؤ طب بصي أنا هقولك صفصف اتفقنا
-اتفقنااااااا

وتترك يدي لتركب إحدى الأراجيح

بعد ان خبطتني صفاء بالمرجيحه وداست ندى على رجلي بالعربيه والشباك اتفتح في راسي:D

احضرت لي ندى كراسه رسمها
-ارسمي لي صفاء هنا
*بس كده دانا محترفه رسم يا بنتي
بس هاتي لي لون احمر عشان شعرها واخضر عشان هيعنيها
لازم الرسمه تبقى متقنه.


تركتني وراحت تضرب او تعض او تجري ورا أي حد من البنات
وكان يقاطعني بالطبع فالمنتصف احدى زميلاتي
"يا سمسم خلي ندى بس تسلم عليا"
"طب بصي مش عايزاها تسلم عليا خليها بس تبطل تضربني"
"اشمعنى انتي يعني مش بيضربوكي"
*يا جماعه دي قدرات بلاش قر بقى يا ساتر
وبعدين دول بنات رقيقات جميلات خالص:D


عندما انتهيت
*ها ايه رايك؟
تنظر لي نظره انتي هبله شكلك
-دي صفاء ؟؟؟؟

رغم صغر سنها كنت كلما اطلت الكلام معها تشعرني انني انا الطفله

*طيب هرسملك انا رينبو
-يعني شكله ايه؟
*ياخبر انتي عمرك ما شفتيه؟؟
-لأ..
*طيب أنا هرسمهولك وابقى أول حد ورهولك خليكي فاكره:d
بعدما انتهييت
-مش فاهماه على فكره
ويعدين مش بحب الفراش بيعض
*لأ يا انسه الفراش مش بيعض
ده أحلى حاجه فالدنيا.. تعرفي انه عشان بيحب النور اوي ممكن زي العيط يروح للنار وفاكرها نور!
تنظر لي بخوف..
أوقن أنها لن تحب الفراش أبدًا الان فأضحك ههههههه

*طب
قوس قزح ده بقى
مش بيطلع غير للناس اللي بيحبهم بس
تلاقيه ماشي وراكي كده
ليا واحده صاحبتي هوريكي صورتها
شافت خمسه قوس قزح كده مثلا
وباذن الله شكله هيخطبها

تنظر لي نفس نظره انتي هبله..:D
*افف الواحد ما يعرفش يسرح بيكي كده ابدًا
وابدأ زغزتها لتتصاعد ضحكتها مره اخرى

أتت مدرسة القران
-طنط أسماء انتي هتيجي بكره وتيجبي لي بالالين صح؟
*اه يا قلبي بس روحي عشان مش تتأخري
هتوحشوني
-ده الدرس مش بيقعد غير حبه صغيرين استنينا..


اثناء خروجي من الدار
ايقنت انني اكتسبت حلم جديد:

"ماما انا هفتح دار ايتام"
قومي نامي يا حبيبتي شكلك التعب مأثر عليكي


اليوم كان عيد الحب
لم افكر باللون الاحمر
لم اشعر بالقرف من كل هذا الابتذال حولي

كان كل ما يشغلني
هو ضحكه صفاء
وشقاوه ندى

أتمنى حقاً أن تنال تلك الفتيات أروع حياة ممكنة

وحسباتي المضنيه لكيفيه فتح دار ايتام
طيب والمكتبه..؟
والمطعم هعمل فيهم ايه؟؟

ممكن يبقى المكتبه الدور الاول
والمطعم التاني
والبنات فوق..


ومذا عن صديقتي ذات الضحكات المتلئلئه*
كيف أجلعها أبسط حد فالدنيا؟؟
أفعكشها ولا انكشها ولا افركشها ولا الكلمه اللي دايما مش بعرف افتكرها دي دايما :d
ازاي بس؟


لم تكن دعوتي هذا العام
ان يتذكرني اصدقائي
أو ان يكون العام القادم افضل
فقط ان لا اسمح للحياه بان تبعدني عن تلك الفتيات أبدا
وعن صديقتي الشفافه
صاحبة قوس قزح ذاللون الواحد فقط
الازرق..

أنا طائر...

"أنا طائرٌ..."

كانت تردِّدُ طفلةً.

هل كانَ ضروريًّا

أن تكسرَ ساقيْها مرَّتين

كي ينتبهوا؟.*

لم يستوعبوا أبدا أنها طائر.
-بجناحات شفافة-
كنارية .. لا تحتمل الشتاء.. لا تحتمل البرد..
لكنها تعلم يقيناً أن بوسعها الطيران.

حدثتهم مطولاً عن آلامها.
أخبرتهم عن تعاستها حين تشعر بوخز الخيانة.

أشارت كثيرًا إلى أنها... طائر.

لكنهم فقط.. تجاهلوا أنينها.

في الحقيقة،

كانوا يفزعون من قدرتها العجيبة على النسيان

الحذف اللا إرادي..

أما هي فلم تكن تكره ذلك.

ذاكرة الطيور ضعيفةٌ على كل حال.

في الحقيقة، تجاهلوا أيضًا تلك الحقيقة.

"لم يَعُدْ يُجْدِي أسفٌ.
ما مضى
لن يُستعادْ
والقليلُ الذي تبقَّى
لا يستحقُّ عناءَ الخطواتِ."*

كان لا بد أن تكف عن الأسى
كان لا بد أن تغلق الباب وتمضي.. أن تخطو خطوات جديدة.**

سواءًا انتبهوا أخيرًا ..

أو تجاهلوا كسر ساقيها كسائر الحقائق.

كان لا بد أن تحاول..

ان تعثرت مرات

ستنجح مرة و تطير..

أنا أثق بها ..

هي طائر..

هي طائر..

هي طائر.


ستطير.

---------------

* سوزان عليوان
** زي ما عملت رحاب القمراية :)

أقرب مما نتخيل

ربنا يرحمك يا هديل..
ربنا يرحمك يا عمرو.

-----------------

22 و 20 سنة.

طب وأسنان.

صاحبتي وزميل لأكتر من 5 سنين.

حادثة عربية.

أرجوكم تدعولهم.

-----------------

وصفتي كي تصبح.. مبسوط أوي

لإحداث تأثير سحري وفعال للوصفة تستخدم فقط مع أي حد:

-بتفرق معاه حالة الطقس، وجود البندق في الشيكولاته، ان كانت الألوان تتحدث فعلاً.
-بيخاف من الزعل وبيزعل من الخوف.
-بيعتبر الملوخية والجيلي كولا غذاء الروح.
-بيكره الحساب والكيمياء وجوز الهند.

-----------------------

الأعراض الجانبية:

-سماع أصوات فيروزية تتردد بأغانٍ سعيدة ومستمرة.
-رؤية وردية مزدوجة لكل الأحداث والأفعال.
-هالة نور تحيط بالمستخدم .. مع سحب من الفراشات والعطور المصاحبة.

في حالة الجرعة الزائدة:

-استفهام، تعجب وذهول يتبعه نشوة للوسط المحيط.
-قد يؤدي تكرار الاستخدام إلى الإدمان.

---------------------

*تحفظ بعيدا عن متناول أي حد بيفكر بنظرية
(كلهم أعدائي) أو أن (الحياة علقة لابد منها).

*تحفظ في مكان سري، صاخب، فوضوي ومترب (أقترح أن يكون فوق الدولاب أو تحت السرير)

*تحذير: اذا استخدمت من قبل أي حد بيفهم في أنواع العربيات أو البورصة أو بيلعب Red Alert على الريق،، يرجى الإستلقاء فورًا والإسراع في استشارة الطبيب.

---------------------

طريقة الإستخدام:

*فجرا؛ أغلق عينيك.. بشهيقٍ عميييييييق وبيقين كامل فكر بأن ذرات جسدك هي أول من اغتسل بذلك الهواء..
"رضيت بالله ربًا، وبالإسلام ديناً، وبمحمد صلى الله عليه وسلم نبيا ورسولا"
هكذا تردد لثلاث مرات بعد سماع أذان الفجر.. رددها.. الآن فقط .. ثق بأن يومك سيكون رائعاً حقًا.

بعد الصلاة.. ابتهل بدعائك المفضل..

"يمكنك ان تدعو لي ان شئت:)"

قفزاً، وبخطوات فرحة أيقظهم جميعًا للصلاة. لاتنس طبعَ قبلة عملاقة على وجنة والدتك وقليلٍ من الزغزغات الفجائية لأخيك.

It’s not that unusual when everything is beautiful

It’s just another ordinary miracle today

* بعد أن تترجل من سيارة الأجرة، قم بتحية العجوز بائع المناديل..
صدقني، بونبوناية وثمن علبة المناديل التي لم تحصل أبدا عليها كفيل بإسعاد ذلك الرجل ليوم كامل.

The sky knows when its time to snow

You don’t need to teach a seed to grow

It’s just another ordinary miracle today

*بنفس الحرارة، قابل كل من تراه، ابتسم للجميع. كلما ازدادت الابتسامات المتناثرة كلما صدق عقلك اللاواعي أنك سعيد بالفعل.

It’s not that usual when everything is beautiful

It’s just another ordinary miracle today

*احذر الأقلام والورق الأبيض -الواحد مش ضامن برده انت ممكن تكتب ايه تعكنن بيه على نفسك- وان كنت في درس ما، فاكتف اليوم بعقلك كوسيلة تسجيل و (المهم اللي في الراس مش الكراس حضرتك).

*تجنب تماماً لمح أي شخص قمت بتمزيق قلبه رغماً عنك أو قام بتمزيق قلبك عمداً.. نظرات العتب ممنوعة منعاً باتاً في وصفات تحضير السعادة.

*قبلة عميقة على رأسٍ باكٍ، ربع جنيه فضى مخروم، ونكتة سخيفة جدًا هي أفعال أكثر من كافية لإسعاد قلبٍ حزين، لكن ان استعصى الأمر: إخطف صديق تحبه بشده .. إلى أقرب محل زهور، اشتر باقة ورود بيضاء مختارة بعناية، يجب أن تغلفاها معاً وبدندناتٍ هادئةٍ:

Life is like a gift they say

Wrapped up for you everyday

Open up and find a way

To give some of your own

ثق بزهرات الجلاديولس فبالرغم من أنها لا تتتميز بالندرة، إلا انها حساسة جدًا ورقيقة جداً جداً، لمساتك ستُشعِر الزهور بالدفء وستحرص على نقله كاملاً لذلك القلب الحزين.


*مع نفس الصديق اذهب الى مكتبتك المعالجة بوكس أند بينز، أن تنادي بائعة الكتب خطئاً بأميرة أو رانيا بدلا من اسمها الحقيقي رحاب سيشعرك حتمًا بالارتياح الى أنك لم تتغيرخلال السنوات العشرين السابقة.
تأكد أنهم لم يحضروا الكتب التي طلبت ثم امض سعيدًا في طريقك.
ْ

Isn’t it remarkable?

Like every time a raindrop falls

It’s just another ordinary miracle today

*وحيداً.. اذهب الى مطعمك المفضل على طاولتك المفضلة ومقعدك المفضل..استرِح.
من أجلى.. اطلب حلوى chease cake.. أطلبها بنكهة الفراولة ..
من أجلى أيضًا.. ولليوم فقط.. لا تجرب نكهات أخرى.

اهمس:

When you wake up everyday

Please don’t throw your dreams away

Hold them close to your heart

Cause we are all a part

Of the ordinary miracle

*حال عودتك لمنزلك، ابتعد تماماً عن التلفاز أو الراديو أو أي وسيلة إخبارية قد تطلعك على مآسي الواقع،
اطمئن،، هروبك من الواقع ليوم واحدٍ وحيد ليس بالفعل الوحشي.

*لكي تمسي "مبسوط أوي" كافئ نفسك بنزهة علاجية على النيل في وقت متأخر جدًا من الليل مع أخيك، قطرة هواء ليلية ونسمة ماء نيلية، هي النهاية المثالية لعملية غسيل الروح.

Do you want to see a miracle?

Its seems so exceptional

Things just work out after all

It’s just another ordinary miracle today


The sun comes up and shines so bright

It disappears again at night

It’s just another ordinary miracle today

It’s just another ordinary miracle today

الوصفة مجربة وينصح باستخدامها طبيب الأسنان

D:

دمتم "مبسوطين أوي" :)

__________________

أغنية ordinary miracle
لـsarah mclachlan

هدايا حنــيـنـة ..

عمرك حسيت ان انت وانت ماشي في طريقك عادي كدا.. لا بيك ولا عليك.. اتكعبلت في مركز الكون؟
وفجأة كل حاجة حواليك بتحصل لغرض.. ليك انت.. انت وبس!


عمرك حسيت ان انت في طريقك دا اتشبكت في مجموعة الحبال الذرية اللي موصلة كل الناس ببعضها وبكل حاجة في الكون

- فقط لأي حد سمع عن نظرية الكوانتم فيزيك غير الأميرة سيناهيت والعائلة.. دا إن وجد!! ‎ D: -

فتتفاجئ بطاقة بشرية كونية هايلة عاملة حواليك هالة "خفية بس انت حاسس بيها" محاوطاك، ماشية معاك في كل مكان كأنها بتحميك أو بتحرسك؟!

------------

بدأت القصة لما كنت ساندة على سور سلم كليتنا، خلصت سكشني ووقفت استنى البنات.. كان سكشن أخير قبل ما ناخد أجازة العيد وكنت واقفة باقلب في دماغي كام مشكلة على كام قرار مصيري على شوية هوا ساقع وعصافير ..

وكان هو طالع السلم .. راجل في منتصف الستينات -على ما أظن- بشعر أبيض وجلابية بيج:

هو: سلامو عليكو "ابتسامة طيبة جدا"

أنا: وعليكم السلام ورحمة الله :)

هو: ربنا يبارك فيكِ يا بنتي.. ربنا يوفقك.. ربنا يوفقك.. ربنا ينجحك ويهديكِ.

أنا في قمة الدهشة : شكـــ ..... طب ... شكــ .... :)))
هو: ربنا يهديكِ.. ربنا يكرمك.. ربنا يوفقك، ربنا يحميكِ.

ويمشي.. يختفي بعيد وأنا مش عارفة اتكلم بس حاسة ان ربنا استجاب.

------------

أيام امتحانات السنة اللي فاتت كنت تعبانة جدا .. كان فيه برده حبة مشاكل مع شوية دوخة وتوهان.
وفي يوم كنت متضايقة جدًا فتحت شباك أوضتي لاقيت يمامة بنية مذهلة الجمال بانية عشها قصاد شباكي..
كنت كل يوم الصبح وانا بافتح الشباك الاقيها مركزة عنيها في عنيا جدًا، كأنها عايزة تقولي حاجة.. أنا أصلا كنت متأكده انها عارفاني وجاية عشان هدف معين .. كانت بتطمن عليا ..
لما عدت الفترة الوحشة دي.. تاني يوم كانت ماشية وسايبة عشها.. زعلت حبة.. كنت فاكره اني مش هاشوفها تاني!

المفاجأة ان أنا بافتح شباكي من يومين كدا.. لاقيتها قاعده في عشها بتبص لي نفس البصة وبتطمن عليا :)

--------------

في العيد..

الدنيا مطرت أخيرا بعد نهار ضلمة أوي وكئيب.. كنت فاكرة ان المطر آخر مفاجأة جميلة الكون عاملها لي..

- تعاااااااااااااالي... بسرعااااااة.... إجريييييييييييييي

والاقي أحلى منظر شفته في حياتي .. قوس قزح بحق وحقيقي.. والله فعلاً قوس قزح ..
ضحكته جميلة ملونة .. آخده السماء من أولها لآخرها .. السما كانت بتضحك لي!!

فيه أكتر من كدا؟؟!

--------------

انهارده بقى بغض النظر عن ان القمر كان بدر ودي لوحدها باعتبرها نعمة وهدية من ربنا كل شهر لعباده :)
وبغض النظر عن يوم رائع مابيتكررش بجد قضيته مع واحدة عندها أصفى وأنقى وأجمل قلب في الدنيا..

كتاب" أرز باللبن لشخصين" رجع لي انهارده بعد غياب وافتقاد لأقصى حد..
بافتحه وكانت أول حاجة قريتها فيه:

" القطة المشمشي ضحكت كده وقالت: ( ماتخافيش.. أكيد هتوصلي في الآخر لمكان معين.. لو مشيتي كفاية) "

--------------

كل سنة وانتم طيبين..
كل سنة والكون كله طيب ..

كل سنة وربنا راضي عننا وواهبنا نعمه اللي ماتتعدش :)

أسف

واصطفانيَ الصمتُ لأكونَ رهانَهُ الأخير

سوزان عليوان