١٧ يناير، ٢٠٠٩

وصفتي كي تصبح.. مبسوط أوي

لإحداث تأثير سحري وفعال للوصفة تستخدم فقط مع أي حد:

-بتفرق معاه حالة الطقس، وجود البندق في الشيكولاته، ان كانت الألوان تتحدث فعلاً.
-بيخاف من الزعل وبيزعل من الخوف.
-بيعتبر الملوخية والجيلي كولا غذاء الروح.
-بيكره الحساب والكيمياء وجوز الهند.

-----------------------

الأعراض الجانبية:

-سماع أصوات فيروزية تتردد بأغانٍ سعيدة ومستمرة.
-رؤية وردية مزدوجة لكل الأحداث والأفعال.
-هالة نور تحيط بالمستخدم .. مع سحب من الفراشات والعطور المصاحبة.

في حالة الجرعة الزائدة:

-استفهام، تعجب وذهول يتبعه نشوة للوسط المحيط.
-قد يؤدي تكرار الاستخدام إلى الإدمان.

---------------------

*تحفظ بعيدا عن متناول أي حد بيفكر بنظرية
(كلهم أعدائي) أو أن (الحياة علقة لابد منها).

*تحفظ في مكان سري، صاخب، فوضوي ومترب (أقترح أن يكون فوق الدولاب أو تحت السرير)

*تحذير: اذا استخدمت من قبل أي حد بيفهم في أنواع العربيات أو البورصة أو بيلعب Red Alert على الريق،، يرجى الإستلقاء فورًا والإسراع في استشارة الطبيب.

---------------------

طريقة الإستخدام:

*فجرا؛ أغلق عينيك.. بشهيقٍ عميييييييق وبيقين كامل فكر بأن ذرات جسدك هي أول من اغتسل بذلك الهواء..
"رضيت بالله ربًا، وبالإسلام ديناً، وبمحمد صلى الله عليه وسلم نبيا ورسولا"
هكذا تردد لثلاث مرات بعد سماع أذان الفجر.. رددها.. الآن فقط .. ثق بأن يومك سيكون رائعاً حقًا.

بعد الصلاة.. ابتهل بدعائك المفضل..

"يمكنك ان تدعو لي ان شئت:)"

قفزاً، وبخطوات فرحة أيقظهم جميعًا للصلاة. لاتنس طبعَ قبلة عملاقة على وجنة والدتك وقليلٍ من الزغزغات الفجائية لأخيك.

It’s not that unusual when everything is beautiful

It’s just another ordinary miracle today


* بعد أن تترجل من سيارة الأجرة، قم بتحية العجوز بائع المناديل..
صدقني، بونبوناية وثمن علبة المناديل التي لم تحصل أبدا عليها كفيل بإسعاد ذلك الرجل ليوم كامل.

The sky knows when its time to snow

You don’t need to teach a seed to grow


It’s just another ordinary miracle today



*بنفس الحرارة، قابل كل من تراه، ابتسم للجميع. كلما ازدادت الابتسامات المتناثرة كلما صدق عقلك اللاواعي أنك سعيد بالفعل.

It’s not that usual when everything is beautiful

It’s just another ordinary miracle today


*احذر الأقلام والورق الأبيض -الواحد مش ضامن برده انت ممكن تكتب ايه تعكنن بيه على نفسك- وان كنت في درس ما، فاكتف اليوم بعقلك كوسيلة تسجيل و (المهم اللي في الراس مش الكراس حضرتك).

*تجنب تماماً لمح أي شخص قمت بتمزيق قلبه رغماً عنك أو قام بتمزيق قلبك عمداً.. نظرات العتب ممنوعة منعاً باتاً في وصفات تحضير السعادة.

*قبلة عميقة على رأسٍ باكٍ، ربع جنيه فضى مخروم، ونكتة سخيفة جدًا هي أفعال أكثر من كافية لإسعاد قلبٍ حزين، لكن ان استعصى الأمر: إخطف صديق تحبه بشده .. إلى أقرب محل زهور، اشتر باقة ورود بيضاء مختارة بعناية، يجب أن تغلفاها معاً وبدندناتٍ هادئةٍ:

Life is like a gift they say

Wrapped up for you everyday


Open up and find a way


To give some of your own


ثق بزهرات الجلاديولس فبالرغم من أنها لا تتتميز بالندرة، إلا انها حساسة جدًا ورقيقة جداً جداً، لمساتك ستُشعِر الزهور بالدفء وستحرص على نقله كاملاً لذلك القلب الحزين.


*مع نفس الصديق اذهب الى مكتبتك المعالجة بوكس أند بينز، أن تنادي بائعة الكتب خطئاً بأميرة أو رانيا بدلا من اسمها الحقيقي رحاب سيشعرك حتمًا بالارتياح الى أنك لم تتغيرخلال السنوات العشرين السابقة.
تأكد أنهم لم يحضروا الكتب التي طلبت ثم امض سعيدًا في طريقك.
ْ
Isn’t it remarkable?

Like every time a raindrop falls


It’s just another ordinary miracle today


*وحيداً.. اذهب الى مطعمك المفضل على طاولتك المفضلة ومقعدك المفضل..استرِح.
من أجلى.. اطلب حلوى chease cake.. أطلبها بنكهة الفراولة ..
من أجلى أيضًا.. ولليوم فقط.. لا تجرب نكهات أخرى.

اهمس:

When you wake up everyday

Please don’t throw your dreams away


Hold them close to your heart


Cause we are all a part


Of the ordinary miracle



*حال عودتك لمنزلك، ابتعد تماماً عن التلفاز أو الراديو أو أي وسيلة إخبارية قد تطلعك على مآسي الواقع،
اطمئن،، هروبك من الواقع ليوم واحدٍ وحيد ليس بالفعل الوحشي.

*لكي تمسي "مبسوط أوي" كافئ نفسك بنزهة علاجية على النيل في وقت متأخر جدًا من الليل مع أخيك، قطرة هواء ليلية ونسمة ماء نيلية، هي النهاية المثالية لعملية غسيل الروح.

Do you want to see a miracle?

Its seems so exceptional

Things just work out after all

It’s just another ordinary miracle today



The sun comes up and shines so bright


It disappears again at night


It’s just another ordinary miracle today


It’s just another ordinary miracle today


الوصفة مجربة وينصح باستخدامها طبيب الأسنان

D:

دمتم "مبسوطين أوي" :)

__________________

أغنية ordinary miracle
لـ
sarah mclachlan

14 فضفضوا:

غير معرف يقول...

دي وصفه هايله ودى وصفه سهله....
ههههههههههههههههههه
تسلم ايديكي وافكارك الجميله التي تدخل علي القلب علي طوووووووووول

romansy يقول...

بس حد جربها قبل كده
وحصله حاجه

فكره جميله الوصفه دى

دا احنا هنبقى طايرن من الانبساط

blue-wave يقول...

الله عليكى
انتى رائعة بجد

لا يدوم اغترابي يقول...

انا مبسوطة جدا خالص
اوي اوي فعلا يعني
وده لمجرد اني قريت وصفتك
امال لما اجربها هيجرالي ايه؟؟!!
انتي بجد شخصية جميلة اوي
اويييييييييييييييي:)
يا رب تفضلي دايما سعيدة
ومبسوطة وفرحانة ويملا حياتك
شوكولاتة وفراشات وألوان جميلة
وعلى فكرة
يا ريت تجربي الشوكولاتة باللوز ؛ )

أنــا يقول...

ههههههههه
‏"تجي نتفق اتفاق؟!"...
‏"ايه رأيك تبقى مبسوطه؟؟"
مش عارفه من غيرك كنا هانعمل ايه؟
عندك حق لازم نبعد عن حجات كتير وناس كتير عشان مانزعلش..
ولازم نقرب من قلوب صافيه زي قلبك عشان نقدر نعيش مبسوطين..
بحبك أوي ياريم
وصفتك حلوه جدا وجميله جدا بس انا شيفاها صعبه جدا جدا
بس ان شاء الله هانفذها طالما انتي جمبي..
عجبني جدا الجزء الانجلش في التدوينه
تسلم اديكي ويارب السعاده تكون حياتك..
Thanx 4 being in my life :)

إيناس حليم يقول...

سماع أصوات فيروزية تتردد بأغانٍ سعيدة ومستمرة.
ههههههههههههههه
الاعراض ده عندي باستمرار
:)) بجد مدونة جميلة جدا
بس الوصفة مش سهلة أوي :)))
تحياتي

كأنني أنا يقول...

أنا اللي هي مش أنا :

ههههههههههه

وتسلمي لي يا جميل ؛)

كأنني أنا يقول...

رومانسي:

طبعًا متجربة ونتايجها مضمونة كمان.. أمال ايه!

ههههههههه

ربنا يسعدك دايما يا فندم :)

كأنني أنا يقول...

blue wave:

ربنا يكرمك يا دكتر..

الرائع هو متابعتك المتميزة لفراشتي

:)))

يارب تنورها دايما

كأنني أنا يقول...

لا يدوم اغترابي:

:))))

انتِ اللي سكراية وقمراية كمان يا حبيبتي...

تسلمي لي يا حبيبة قلبي ويارب يا رب يقبل دعواتك دي لينا كلنا:)

تفتكري بجد الشوكولاته باللوز جميلة؟
بصي هاجربها ان شاء الله واشوف كدا:)

نورتيني بجد وفرحني كومنتك دا أكتر من البون بون بالكولا واللوليتا بالفراولة :D

كأنني أنا يقول...

أنا اللي هي أنا بس مش أنا بردهD: :

ههههههههههههه

طب بذمتك مش لما اتفقت معاكِ الاتفاق ده كل حاجة بقت كويسة ؟ D:

والله يا منمونتي عمرك ماهتقدري تتخيلي انا اللي بحبك أد ايه :)

وبعدين يا أنسة الوصفة سهلة ومافيهاش أي حاجة.. انتِ بس جربيها وسيبيها على الله.

وانا وراكي يا قمري لحد ماكله يبقى تمام :))))


ربنا يسعدك يا حبيبة قلبي وتبقي دايما فرحانة أوي

كأنني أنا يقول...

ايناس حليم:

ههههههههه.. يا بختك بالأصوات الفيروزية.

شكرا يا حبيبتي انتِ اللي جميلة أوي بجد

بس والله حاولي هتلاقيها سهلة جدا وفعالة جدا جدا جدا :)

نورتيني يا جميل يا رب تعيشي دايما مبسوطة أوي :))

Ahmed Hishmat يقول...

ومين يقدر على كل ده
ومره واحدة في يوم واحد
ممكن يحصله صدمه انبساطية

كأنني أنا يقول...

أحمد حشمت:

أخ.. ماهو الخوف من الصدمات الانبساطية دي..

عشان كدا لازم اللي يجربها.. يكون مستعد وعلى وعي تاااام بالعواقب.
وربنا يسترها معانا جميعاً D:


نورتني يا فندم:)