٢١ مارس، ٢٠٠٩

سعادتي بك :)



أعترف أن ذاكرتي المستهلكة تمحو جميع الأحداث بحلوها ومرها بلا سابق انذار.. لكن شيئًا لن يستطيع محو تلك الذكرى:

أنا أذكر جيدًا ذلك اليوم، يوم ابتدأت صداقتنا، أجل أجل.. أذكر حين كنت بمكان ما بقرب قلبك.. بين أحشائك.. أسمع نبضاتك الحنون وأعيش بها.. صوتها الممزوج بهمساتك الدافئة.. بأغنيتي المفضلة ربما.. أو ربما بأقاصيص الجمال والسحر..
أذكر جيدًا كلماتك التي لم أع منها حرفًا.. كنتِ تعلمين ذلك لكنك أصررت على انشاء ذلك الحوار..
منذ ان كنت مضغة بداخلك.

كانت بدايتي صوتك.. أمان لا أحسه إلا بك.. بجوارك.. معكِ حبيبتي.

لقد قمتُ سيدتي بالقليل من العمليات الحسابية البسيطة جدًا وحصرتُ الكثير من الأسباب العادية جدًا..
فإذا بتلك الحقيقة تتجلى أمام ناظري:

<<<انتِ أحسن أم في الدنيا>>>

شكرًا أمي .. شكرًا

شكرًا لكل الليالي التي تسللتُ بها في الظلام .. تحت غطائك..
بأقدام شبه متجمدة.. والتصقت بجسدك الحنون..
وان استمر انبعاث الصقيع إليك مني طوال الليل.. لم يخفت دفئك لحظة.

شكرًا لكل المرات (اللي قفتشيني فيها وانا عاملة مش زعلانة وباضحك أوي عشان ماضايقكيش) فأفاجأ وَسْط تعالي ضحكاتي بــ(مالك يا حبيبتي؟ في حاجة مزعلاكي؟)

شكرًا لأن حبك العادل لم يفرق يومًا بيني وبين أخي.. حتى وان اشتدت صيحات الغيرة
-الغيرة دي داء بعيد عنكم-

حبيبتي.. أنا أدرك تمام الإدراك أن هو الكبير وانا آخر العنقود هو الراجل وأنا بنوتك.. هو قلبك وأنا قلبك.

شكرًا لكل أوقات (بعد الكلية) اللي باصدع دماغك فيها برغيي الأبدي اللامنتهي.. دون أدنى شكوى أو احساس بالملل.

شكرًا لامتلاكك جهاز الاستشعار عن بعد لأي خطر محدق.. فتكون نصيحتك خير عون لي
وشكرًا أوي يعني لاني لما باعند مع حضرتك باخد على دماغي:)

شكرًا على المساحة الــ4 سم التي أحتلها -بمعنى أصح أنحشر بها- بأي كنبة استلقيتِ عليها.. فقط لأنعم بقربك.

شكرًا لأن روحك الملونة تجعل تنزهنا أمتع ومناقشاتنا أمتع وحتى لعبنا بالبالونات.. أمتع وأمتع.

شكرًا لسلامنا السري الخاص جدًا ;)

شكرًا لتشجيعك ومتابعتك المشتاقة دوماً لكتاباتي ولوحاتي العبيطة مذ كنت في العاشرة..
لَكَم أقنعتني أنها في غاية الروعة في الوقت الذي كنت أعلم يقينًا أنها حمقاء طفولية بالغة السوء!


شكرًا لصفاء نفسك الذي يذهلني ونقاء روحك الذي يبهرني
شكرًا لثقافتك التي أتباهى بها دوماً.


شكرًا على شجارنا الأزلي بسبب قلة أكلي وشدة قلقك:)

شكرًا لأن قلبك مفتوح على الدوام لأي (ماما أنا عملت حاجة غلط .. والنبي ماتزعقيش)
شكرًا لأنك بتزعقي برضه :)

شكرًا لانك فكرتِ معي وحلمتِ معي و كبرتِ معي.

شكرًا لأني أسترق العبارات التي تجمع صفاتنا معا كأن:
(أنتِ شكل ماما أوي.. ياه دي نفس مشية ماما.. نفس ضحكة ماما)
فأحلق بها تحليقًا، بالرغم من أن شخصًا أطلق تلك الأحكام يعني أنه لم يعرف أي منا.. وحتمًا لم يرَ أبي.

شكرًا على الملوخية والبسلة والبامية والبتنجان.. وأطنان البطاطس اللي باحبها:)

شكرًا لأنك قلتيها كدا:(قدامك 6 ساعات لحد بكرة الصبح.. تكوني عملتي المدونة اللي نفسك فيها).

شكرًا لأنك ابنتي وأمي.. شكرًا لأنك أختي وأمي.. شكرًا لأنك صديقتي وأمي..

شكرًا لأنك فعلاً.. أحسن أم في الدنيا.


----------------

** اللوحة للفنان الإيراني مرداد جمشيدي

11 فضفضوا:

Ahmed Hishmat يقول...

ما أجمل هديا الله لنا
بأمهات سيظللن هن باعثي الروح
في حياتنا المليلة
.....
وربنا يخليكي لماما
وبلغيها مني سلامي
وكل سنة وهي طيبة

غير معرف يقول...

مش عارفه اقول غير كلمه واحده
انتي متعوده عليها خالص بتتقالك كل يوم عشر مرات بس هاقولها برده
انتي نور عين ماما وحب ماما وقلب ماما

غير معرف يقول...

وانت طيب يااحمد
بارك الله فيك
ماما

blue-wave يقول...

ربنا يخليهالك يارب
ويباركلنا فى كل امهاتنا

normalgirl يقول...

الله ياريما حلو جدا أنا قلتلك..بس بجد طنط تستاهل اكتر من كده اصلا ربنا يخليهالك وليا يارب تعملي بطاطس مهروسه وجبنه بفلفل اسود ومربى بلح وكفته وسوسيس عالفطار واكيد اجمل سمبوسه فالدنيا:)..ربنا يحفظها يارب

إيناس حليم يقول...

ربنا يخلهاليك يا رب وميحرمكوش من بعض أبدا

كل سنة ومامتك طيبة
وجميع أمهات الدنيا بخير وسعادة وعطاء

أنــا يقول...

ريم بجد بجد .. ايه دااا ..
انا مش عارفه احسد طنط عليكي ولا احسدك على وجود طنط في حياتك :)
مش هحسد بجد.. ربنا يخليكو لبعض بجد ومايحرمكوش من بعض ابدا ..
مش محتاجة اقولك اني من اول ماشفت طنط حسيت انها واحدة صحبتك مش مامتك.. انتو فعلا شبة بعض اوي .. بجد حسيت بفرحة غريبه وانا معاكم ..
فعلا لاحظت طنط وهي دايما بتقولك : " ايوة يا نور عين ماما " ..
قد ايه بجد انتو حلوين اوي ..
كلامك جميل اوي ياريم .. اكيد قليل على مامتك .. بس انتي " بالياء :)" بجد جميلة اوي وسكر اوي اوي..
ربنا يخليكو دايما لبعض ..
كل سنة وحضرتك طيبه يا اجمل طنط في الدنيا .. وشكرا بجد على احلى هدية جبتيهالنا في الدنيا دي ..

ربنا مايحرمنيش منك ياريم .. :)

Ahmed Hishmat يقول...

ايه ده ..
مامتك بنفسها بترد على تعليق ليا
بجد ده كتير عليه
..........
كل سنة وانت طيبة يا ماما
وبارك الله لك في (( ريم ))

غير معرف يقول...

يا بناتي الاحباء بحبكم
اكيد الدنيا بيكم حلوه اوى
I'm lucky
وانت طيب يااحمد ربنا يخليلك مامتك
اكيد انتم ابناء ابرار عشان كدا مقدرين حبنا لكم وده بيسعدنا جدا
وعقبال عيالكم لما يسعدوكم كدا

walaa bahaa يقول...

كل سنة وحضرتك طيبة ياطنط
بجد حضرتك تستاهلي أكتر من
كده ربنا يخليكو لبعض وميحرمكوش من بعض أبدا

ريمة ياعمري وحشتيني أوي أوي بحبك

كأنني أنا يقول...

أحمد حشمت
blue wave
ايناس حليم
أغلى أصدقائي:
أميرتي ومنومنتي وجميلتي ولاء

شكرا لكم جميعًا

أدام الله عليكم نعمة "الحضن الدافي أوي"