١٥ فبراير، ٢٠٠٩

هابي فلانتينز داي:D




*انتي اسمك ايه ياحلوه انتي
-مش هقولك طبعًا
*ليه بس؟
-هو بيبدأ بالدال لو شاطره قولي
*داليا..داليدا..دانا..دلددوله طيب..؟
-هي هي هي ندى يا ذكيه أصلاً
*لأ فعلا بيبدأ بالدال ده حتى أكتر اسم بيبدأ بالدال في الدنيا
طب ما تيجي تلعبي معانا بقى
-لأاااا
ودفعه للخلف كانت جديره بأن تجلعها لا تكرر المحاولة


طب استنو استنو أنا عارفه البنوته دي
*ازيك ازيك مش انتي صفاء برضه
-ها ها ها صفاء يا خبر
وشلوت جميل فالقدم جلعها تخاف صفيه طوال اليوم:D


طب هنعمل إيه يا بنات
هنكلمهم ازاي
دول كارهينا اوي
وصاحبة الدار قالت لنا مش نجيب لعب لهم


تخبر المشرفه إحداهن يا عصمت تعالي سلمي على طنطات
وهي تمسح عينيها في طريقها الي الحمام
-مين دول أصلاً؟:D


تجمعت صفاء وندى وأخذوا يتهامسون بصوت منخفض
ثم فجأه
-احنا أصلا على فكره مش بنحب حد غير طنط اللي لابسه اورانج
أدور بعيني فالمجموعه على تلك المحظوظه بنت اللذينه اللي حبوها القمرات دول

أجد العيون متجهة لي

إيه ده طلعت أنا .. الحمد لله إني لبست إورانج النهرده إحمدك يارب:D

تشجعت قليلاً
ولأنني عبقريه أولاً
و بخاف ثانياً
وكنت عارفه اني هبقى ملبوخه حتى مع حبة عيال ثالثاً
جبت معايا أقلام رصاص وألوان
ومجموعه عمل فقاقيع صابون
بألوان قوس قزح

بمجرد ما طلعتها
هيصه وهيصه وهيصه
واللي فالحمام خرجوا واللي بياكل ساب الأكل واللي بيكرهونا اتجمعوا
اخذنا نجري خلف فقاقيع الصابون فالدار
كانت أكبرنا 24 سنه
ولكنها حقا كانت تبدو أصغر عشر سنوات وهي تركض حلف الفقاقيع وتحمل الفتيات ليطالوها
شاعت البهجه فجأه بمجرد أن علا صوت ضحكاتهم المندفعه

أتت صفيه وندى امسكتا بيدي وصعدنا إلى دور الالعاب
*يلا نتعرف بجد بقى اسمكو ايه
-أنا ندى
وعشان احنا عندنا اتنين ندى فأنا اسمي بندقه
*الله حلوه لايق عليكي شكلك تتاكلي كده
واتي يا صفيه
اسمك ايه؟
-اسمي صفيه
*بس؟
دون ان تنظر بعيني
-صفيه احمد ابراهيم
*مش قصدي يا عبيطه انتي ..تؤ طب بصي أنا هقولك صفصف اتفقنا
-اتفقنااااااا

وتترك يدي لتركب إحدى الأراجيح

بعد ان خبطتني صفاء بالمرجيحه وداست ندى على رجلي بالعربيه والشباك اتفتح في راسي:D

احضرت لي ندى كراسه رسمها
-ارسمي لي صفاء هنا
*بس كده دانا محترفه رسم يا بنتي
بس هاتي لي لون احمر عشان شعرها واخضر عشان هيعنيها
لازم الرسمه تبقى متقنه.


تركتني وراحت تضرب او تعض او تجري ورا أي حد من البنات
وكان يقاطعني بالطبع فالمنتصف احدى زميلاتي
"يا سمسم خلي ندى بس تسلم عليا"
"طب بصي مش عايزاها تسلم عليا خليها بس تبطل تضربني"
"اشمعنى انتي يعني مش بيضربوكي"
*يا جماعه دي قدرات بلاش قر بقى يا ساتر
وبعدين دول بنات رقيقات جميلات خالص:D


عندما انتهيت
*ها ايه رايك؟
تنظر لي نظره انتي هبله شكلك
-دي صفاء ؟؟؟؟

رغم صغر سنها كنت كلما اطلت الكلام معها تشعرني انني انا الطفله

*طيب هرسملك انا رينبو
-يعني شكله ايه؟
*ياخبر انتي عمرك ما شفتيه؟؟
-لأ..
*طيب أنا هرسمهولك وابقى أول حد ورهولك خليكي فاكره:d
بعدما انتهييت
-مش فاهماه على فكره
ويعدين مش بحب الفراش بيعض
*لأ يا انسه الفراش مش بيعض
ده أحلى حاجه فالدنيا.. تعرفي انه عشان بيحب النور اوي ممكن زي العيط يروح للنار وفاكرها نور!
تنظر لي بخوف..
أوقن أنها لن تحب الفراش أبدًا الان فأضحك ههههههه

*طب
قوس قزح ده بقى
مش بيطلع غير للناس اللي بيحبهم بس
تلاقيه ماشي وراكي كده
ليا واحده صاحبتي هوريكي صورتها
شافت خمسه قوس قزح كده مثلا
وباذن الله شكله هيخطبها

تنظر لي نفس نظره انتي هبله..:D
*افف الواحد ما يعرفش يسرح بيكي كده ابدًا
وابدأ زغزتها لتتصاعد ضحكتها مره اخرى

أتت مدرسة القران
-طنط أسماء انتي هتيجي بكره وتيجبي لي بالالين صح؟
*اه يا قلبي بس روحي عشان مش تتأخري
هتوحشوني
-ده الدرس مش بيقعد غير حبه صغيرين استنينا..


اثناء خروجي من الدار
ايقنت انني اكتسبت حلم جديد:

"ماما انا هفتح دار ايتام"
قومي نامي يا حبيبتي شكلك التعب مأثر عليكي


اليوم كان عيد الحب
لم افكر باللون الاحمر
لم اشعر بالقرف من كل هذا الابتذال حولي

كان كل ما يشغلني
هو ضحكه صفاء
وشقاوه ندى

أتمنى حقاً أن تنال تلك الفتيات أروع حياة ممكنة

وحسباتي المضنيه لكيفيه فتح دار ايتام
طيب والمكتبه..؟
والمطعم هعمل فيهم ايه؟؟

ممكن يبقى المكتبه الدور الاول
والمطعم التاني
والبنات فوق..


ومذا عن صديقتي ذات الضحكات المتلئلئه*
كيف أجلعها أبسط حد فالدنيا؟؟
أفعكشها ولا انكشها ولا افركشها ولا الكلمه اللي دايما مش بعرف افتكرها دي دايما :d
ازاي بس؟


لم تكن دعوتي هذا العام
ان يتذكرني اصدقائي
أو ان يكون العام القادم افضل
فقط ان لا اسمح للحياه بان تبعدني عن تلك الفتيات أبدا
وعن صديقتي الشفافه
صاحبة قوس قزح ذاللون الواحد فقط
الازرق..




13 فضفضوا:

romansy يقول...

اول تعليق


ل


رومنسى

romansy يقول...

كل سنه وانتم كلكم طيبين
عرفتى تضحكى على الاطفال باللون الاورانج دا بس بقى لعبتى وهيصتى معاهم ودى اسعد لحظات فى الدنيا
ياريت لو كل فتره حد فينا يقدر يعمل كده
تبقى الدنيا دى هتتغير كتير

أنــا يقول...

بوست رائع فظيع رهيب وحجات كتير جدا كدا ...
بجد يا سمسم تعبيراتك جميله جدا ..
أنا كنت حاسة وكأن انا مش بقرأ كلام ..لأ..
كأني كنت معاكي هناك ..
بجد حاجه جميله جدا ..
والاحساس مع الطفال دا بيكون اروع احساس في الدنيا ..
عارفه هما ليه حبوكي؟؟
لان انتي فعلا طفلة .. مش طفله كبيره .. لا .. طفله بجد .. في براءتك وحركاتك وشكلك ..
ودي اجمل حاجه فيكي ..
احساسك كان جميل وتعبيرك عنه اجمل ..


وحشاني اوي على فكره ..
كل سنة وانتي طيبه ..
كل سنة وانتي حبيبتي :)

blue-wave يقول...

بجد احساس رائع رائع رائع

غير معرف يقول...

احنا فعلا عشنا معاكي اللحظات الجميله دي
يارب يكتب للبنات دي مستقبل مشرق
ويبعد عنهم الشر والشريرين

عبد الحميد محمد يقول...

على الاقل هناك من يهتم بهم و بمستقبلهم
هؤلاء وجدوا ضالتهم التي لم يبحثوا عنها ابدا
لانهم حتى اصغر من ان يعرفوا انها كذلك
كل ما كان يعنيهم هو ان يحصلوا على فتاة حنونة و لونها " برتقالي " و قد حصلوا عليها

فهنيئا لهم

كأنني أنا يقول...

*كالعادة .. بعد ماكنت زعلانة اوي اني ماكنتش معاكو يومها.. فرحتيني بكل كلمة كتبتيها في البوست دا.. بجد حسيت ان انا عارفة البنات دول وباحبهم اوي

وتأكدت يعني ان انا مش هسيب أي ظروف تمنعني من اني اجي المرة الجاية، ان شاء الله :))

*أصلا الأطفال بيشوفوا من جوا.. زي ماتفقنا
ودول بالذات كمان ليهم وضع خاص وبيشوفوا من جوا اوي اوي يعني :)

عشان كدا مش البرتقالي هو اللي خلاهم يحبوكي يا قلبي ..

* انا حسبتها أصلا خلاص ولو أنا وانتِ وأمينة وسها وأية حوشنا كل مصروفنا من دلوقتي لحد ما يبقى عندنا 83 سنة كدا ولا حاجة هنعرف نفتح الدار والمكتبة والمطعم ومقهى فيروز كمان ان شاء الله، ومن وسع... قولي يا رب D:

*اما عن صاحبتك "مدام رينبو".. فماتقلقيش انتِ "بتشألطيها" أصلاً من غير ماتعرفي :))

normalgirl يقول...

سوري اتأخرت فالرد واسفه بجدبس ظروف:)

رومانسي
عندك حق لوبس ماخليناش الدنياتشغلنا بالمظاهرعن الحجات الحقيقيه هتبقى الحياه حلوه أوي

normalgirl يقول...

منمن

انابس كل اللي عملته اني حكيت تخيلي بقى الإحساس الحقيقي كان ازاي
كان نفسي بجد تكونو معايا
وبعدين انامش عيله واهو انت‎:D

normalgirl يقول...

بلو وايف

شكرا:-)
اتمنى كلنا نجربه

normalgirl يقول...

طنط بحالهامنوراني:-)

يارب بجد يكونو احسن حد لمايكبرو

normalgirl يقول...

عبد الحميد محمد
شكرا
بجد تعليقك فرحني:-)

normalgirl يقول...

كبكوبه قلبي الزرقاء

انا فرحانه بجد ان البوست عجبك واساسا اساسامش بمزاجك انك تيجي أو ماتجيش كده كده هتيجي‎:-D
تفتكري الربع جنيه بتاع كل يوم ده هيكفي؟
وردايه ونجمايه بتبرق لقلبك