٢٤ فبراير، ٢٠٠٩

شتويات


بعد أن فشلت أطنان الثياب التي التحفت بها وكوب الكابتشينو العملاق"أبو رغوة جنان" في التحايل على برودة أطرافها..
واقناع دورتها الدموية بالمرور ولو خطأً عبر شرايين قدميها المتجمدتين،

تنهدت، ثم جلست في أسفٍ تتذكر..

من كام شتا بس.. كانت تؤمن بأن أيسر الطرق لحياكة كوفية، قفازين ولكلوك صوفي سميك جداً..
هي ببساطة.. تناول حساء العدس الساخن..
تحت البطانية

ربما يجدر بها حقاً أن تجرب المثلجات في ظل ذلك الطقس.. على سبيل التغير!!ا

-_-_-_-_-_-_-_-_-_-_-

كانت تمضي صباحاً في طريقها المعتاد..
وبداخل سيارة الأجرة، حدثها السائقُ المسنُ عن الحياة ومفاجآتها.. عن متاهات الزمان التي تُفضي دوماً إلى محطات الوصول القدرية، عن ترك المستقبل وما فيه للوكيلِ عالم الغيب..

رغم دلال الشمس وتمنعها عن الظهور وقتها.. أخبرها أن يومه لابد سعيدًا .. اذ ابتدأ باصطباحتها المشرقة.

من كام شتا بس.. كانت تعلم يقينا أن الأرضَ جسمٌ مسطحٌ.. أو طريقٌ طويل، طويييييييييل
كان يستحيل بذهنها مصطلح الــ(الكرة) أو حتى البالونة الأرضية.

ربما يجدر بها الآن أن تسير بجدية كي تصل أخيرًا إلى نهاية ذلك الطريق..

-_-_-_-_-_-_-_-_-_-_-

بماءٍ دافئٍ متدفق.. ستسبغ الوضوء
ستستخير..
ستستخير كلما أمسَت منزعجة.. عساه خيرًا.

من كام شتا بس كانت تصلي لله استخارةً..
أتكمل الدروس الخصوصية في الرياضيات أم تعترف لذاتها الصغيرة بأنها فعلياً (تضييع وقت)؟! ا

وان أستمرت..أتذهب لـ أ. عادل أم عاطف.. عاطف أم عادل...
أم عبد الرحمن؟؟

ربما يجدر بذاتها الكبيرة الحالية أن تتنفس الصعداء.. وتكف عن الإنزعاج.

-_-_-_-_-_-_-_-_-_-_-


قبالة المرآة وقفت.. تفحصت بعناية جفنيها المتورمين بفعل الحساسية ربما..

Loose areas as subcutaneous tissue of eye lids allow
accumulation of a large amount of fluid exudate

من كام شتا بس.. كان شغلها الشاغل أن (تطلع الأولى عالمدرسة) كي تأخذ بثأرها من (سارة الشريرة) التي ما صادقتها إلا كي تتعلم منها كيفية استخدام أقلام التلوين الخشبية دون أن تخرج عن حدود الرسمة... الشريييييييرة!ا

إيييييييه..

ربما يتوجب عليها بجد أن تقفز حالاً عن اللاب لتستأنف مذاكرة مادة الباثولوجي.. الغلسة أوي.

ادعولي

:)


26 فضفضوا:

إيناس حليم يقول...

ههههههههههههه
والله انت سكر
أنا بحب مدونتك دي أوي.. لذيذة جدا و بتحسسني بحجات حلوة..
بس خليتيني أبرد أكتر منا بردانه :))

ربنا يوفقك يا جميلة

Ahmed Hishmat يقول...

من كام شتا
والدنيا غرقانة قوي
متفتته
من كام شتا
وقلوبنا ترجع مستحيل
متجددة
من كام شتا
لم الولد حبره الغميق
من ع الورق
وانا قولت هاتو الحبهان
علشان طعامته
جابو معاهم مستكة

دعـاء عـلى يقول...

أقولك ايه بس !
من كام شتا مكنتش أنا أنا
:
:
بوسه كبييييييره عشان تدفيكى (:
و ربنا معاكى فى الباثولوجى الغلسه جدا!

Foxology يقول...

انا فعلا بقول ان الشتا بيخللى الواحد فى حالة ذهنية رائعة

فى الشتا وفى اوقات متأخرة من الليل الواحد بيراجع نفسه كتير اوى يمكن بحكم الحالة بتاعة الصفاء الذهنى اللى قلت عليها :)

تحياتى :)

روابط يقول...

أول زياراتى هنا, ولن تكون الأخيرة

اسلوبك بسيط ومباشر فى الكتابة, من الواضح ان لك باعا طويلا مع القراءة

عجبتنى بصراحة شتوياتك, محاولاتك لأستجلاب الدفء, تذكرنى بنفسى فى البرد, وعلى فكرة فكرة تجربة المثلجات جديرة بالتجربة

حتى لا اطيل عليك, ربنا يوفقك فى الباثولوجى.... تحياتى

TeaWater يقول...

ههههههههه
ع فكرة بجد لو عوزة تدفى اوى كلى ايس كريم
انا جربتها كتير وف عز المطرة كمان
ف انتظار المزيد منك
وانتظار تعليقك على اول خاطرة بمدونتى

http://teawaterkanarea.blogspot.com/2009/03/blog-post.html

normalgirl يقول...

من ساعه ماقلتيلي انك بردانه واناخايفه جدا
حاسه ان السبب مش برد الجو والمطره والبرق والرعد
على الرغم من كده
انالسه عند وعدي اني أول قبضه مرتب ليا بعد عمر طويل هجيبلك دفايه مصغره تعلقيهامعاكي دايما‎:-D
حضون عميق عشان تخفي

Batoooot_soso يقول...

هههههههههههه
السلام عليكم الاول
بجد مدونتك ديه جميله
ولو عوزة تدفى جدا دش سااااااااااااقع
هههههههههههه
تحياتى بطوووط
اتمنى الزياره

كأنني أنا يقول...

ايناس حليم:

D:D:
معلش ياجميل مش قصدي بس يالله اهو الجو اتظبط جدا الأيام دي عشان خاطرك بس :))

ربنا يخليكِ لفراشتي يا ايناس.. أنا اللي باحس بجد بحاجات حلوة اوي لما اشوف كومنتك.. تسلمي يارب

كأنني أنا يقول...

أحمد حشمت:

الله..

بجد حلوة اوي اوي اوي.. على فكرة، أنا دورت كتير جدا على القصيدة اللي حضرتك جايب الكلام دا منها مالاقيتهاش.. ياترى حضرتك اللي كاتبها؟

منورني بجد يافندم :)

كأنني أنا يقول...

الجميلة.. دعاء علي:

:))
مش قادرة اوصفلك احساسي ساعت ماقريت كومنتك.. أنا فعلا دفيت ساعتها:)

شكرا يادعاء على وجودك الجميل

ღϠ₡ღأمير الهدوءღϠ₡ღ يقول...

^_^

ربنا يوفقك يا رب
مدونه جميله جداا


تحياتي

حاتم عرفة يقول...

فراشة..
:)
للخرس حدود..
تتخطينها بما تفعلينه بي..
..
:)

Ahmed Hishmat يقول...

أيوه أنا اللي كاتبها
شكرا ليكي ذوقك

كأنني أنا يقول...

foxology:

ماهو تقريبا البرد بيسحب الدم من الأطراف ويحدفها عالدماغ D:

تشرفت بزيارتك:)
مودتي

كأنني أنا يقول...

حازم سويلم:

ربنا يكرمك يا سيد حازم :))

محاولات استجلاب الدفء لم تنجح الا بالكتابة.. ربما ..

وربما بتواجدكم :)

----------

أما عن فكرة الآيس كريم..
بيقولوا ان انت بتنزل درجة حرارة جسمك أقل من الوسط المحيط وبالتالي هتحس بالدفء.. بس أنا اعتبرت دا نوع من أنواع التعذيب بصراحة D:

أعدك بالمحاولة على كل حال :)


زيارتك الأولى أسعدتني بحق..

شكرا لك :)

كأنني أنا يقول...

TeaWater:

أثق بك ..
وبما أنها أثبتت نجاحها معك.. سأحاول أنا الأخرى :)

دقائق قليلة وأكون عندك يا قمر

نورتيني بجد:)

كأنني أنا يقول...

سيناهيت الجميلة أوي:

أعتقد انك صح بدليل ان البرد راح ولسه في هوا ساقع أوي ... جوا

ولا يهمك يا عمنا..
يحيا الدفء مادام الأمل موجود :)

شكرا لحنانك ياأدفى قلب في الدنيا

كأنني أنا يقول...

بطوط:

يا نهااااااار

يعني أنا ماكنتش عايزة أكل ايس كريم.. أقوم اخده دش ساقع؟!!

هههههههه
عموما هو ده التميز D:

بطوط.. نورتيني بجد وأعدك بالزيارة:)

كأنني أنا يقول...

أمير الهدوء:

شكراً لك :))

ربنا يوفقنا كلنا

كأنني أنا يقول...

حاتم عرفة:

كفاك الله شر الخرس :))

أشكرك بشدة على تواجدك النوَّار

كأنني أنا يقول...

أحمد حشمت:

:))))

دمتَ مبدعاً

غير معرف يقول...

ستوته.....
حب ماما كمان....
هاضيف بس عن معلومة الايس كريم ان لما تنزل حرارة الجسم عن الوسط المحيط يقوم الجسم يكافح لاننا ذوات الحراره الثابته
ويحدث ما يعرف بال shivering اي الرعشه فيها يولد طاقه فتدفي
علي طول بحبك واتمني لكي التوفيق
ماما

walaa bahaa يقول...

من كام شتا بس كنت معاكي دايما ومش بنفترق أبدا بس هو نصيب

المهم انتي زي السكر وهتفضلي في بالي مدى الحياة يارب تكوني خلاص دفيتي

بحبك

كأنني أنا يقول...

مامتي الجميلة:

ياااااااه

يعني احنا لازم نوصل لدرجة اننا نرتعش عشان ندفى..

وعلى ايه كل دا؟! D:

شكرا يا أمي لأنك هنا :)

كأنني أنا يقول...

ولاء بهاء:

ليت تلك الشتويات تعود..

لكنه النصيب، فلعله خير.. :)

باحبك أوي بجد

دمتِ بقلبي:)