١٣ ديسمبر، ٢٠٠٨

هدايا حنــيـنـة ..




عمرك حسيت ان انت وانت ماشي في طريقك عادي كدا.. لا بيك ولا عليك.. اتكعبلت في مركز الكون؟
وفجأة كل حاجة حواليك بتحصل لغرض.. ليك انت.. انت وبس!


عمرك حسيت ان انت في طريقك دا اتشبكت في مجموعة الحبال الذرية اللي موصلة كل الناس ببعضها وبكل حاجة في الكون

- فقط لأي حد سمع عن نظرية الكوانتم فيزيك غير الأميرة سيناهيت والعائلة.. دا إن وجد!! ‎ D: -

فتتفاجئ بطاقة بشرية كونية هايلة عاملة حواليك هالة "خفية بس انت حاسس بيها" محاوطاك، ماشية معاك في كل مكان كأنها بتحميك أو بتحرسك؟!

------------

بدأت القصة لما كنت ساندة على سور سلم كليتنا، خلصت سكشني ووقفت استنى البنات.. كان سكشن أخير قبل ما ناخد أجازة العيد وكنت واقفة باقلب في دماغي كام مشكلة على كام قرار مصيري على شوية هوا ساقع وعصافير ..

وكان هو طالع السلم .. راجل في منتصف الستينات -على ما أظن- بشعر أبيض وجلابية بيج:

هو: سلامو عليكو "ابتسامة طيبة جدا"
أنا: وعليكم السلام ورحمة الله :)

هو: ربنا يبارك فيكِ يا بنتي.. ربنا يوفقك.. ربنا يوفقك.. ربنا ينجحك ويهديكِ.
أنا في قمة الدهشة : شكـــ ..... طب ... شكــ .... :)))
هو: ربنا يهديكِ.. ربنا يكرمك.. ربنا يوفقك، ربنا يحميكِ.

ويمشي.. يختفي بعيد وأنا مش عارفة اتكلم بس حاسة ان ربنا استجاب.

------------

أيام امتحانات السنة اللي فاتت كنت تعبانة جدا .. كان فيه برده حبة مشاكل مع شوية دوخة وتوهان.
وفي يوم كنت متضايقة جدًا فتحت شباك أوضتي لاقيت يمامة بنية مذهلة الجمال بانية عشها قصاد شباكي..
كنت كل يوم الصبح وانا بافتح الشباك الاقيها مركزة عنيها في عنيا جدًا، كأنها عايزة تقولي حاجة.. أنا أصلا كنت متأكده انها عارفاني وجاية عشان هدف معين .. كانت بتطمن عليا ..
لما عدت الفترة الوحشة دي.. تاني يوم كانت ماشية وسايبة عشها.. زعلت حبة.. كنت فاكره اني مش هاشوفها تاني!

المفاجأة ان أنا بافتح شباكي من يومين كدا.. لاقيتها قاعده في عشها بتبص لي نفس البصة وبتطمن عليا :)

--------------

في العيد..

الدنيا مطرت أخيرا بعد نهار ضلمة أوي وكئيب.. كنت فاكرة ان المطر آخر مفاجأة جميلة الكون عاملها لي..

- تعاااااااااااااالي... بسرعااااااة.... إجريييييييييييييي

والاقي أحلى منظر شفته في حياتي .. قوس قزح بحق وحقيقي.. والله فعلاً قوس قزح ..
ضحكته جميلة ملونة .. آخده السماء من أولها لآخرها .. السما كانت بتضحك لي!!

فيه أكتر من كدا؟؟!

--------------

انهارده بقى بغض النظر عن ان القمر كان بدر ودي لوحدها باعتبرها نعمة وهدية من ربنا كل شهر لعباده :)
وبغض النظر عن يوم رائع مابيتكررش بجد قضيته مع واحدة عندها أصفى وأنقى وأجمل قلب في الدنيا..

كتاب" أرز باللبن لشخصين" رجع لي انهارده بعد غياب وافتقاد لأقصى حد..
بافتحه وكانت أول حاجة قريتها فيه:

" القطة المشمشي ضحكت كده وقالت: ( ماتخافيش.. أكيد هتوصلي في الآخر لمكان معين.. لو مشيتي كفاية) "

--------------

كل سنة وانتم طيبين..
كل سنة والكون كله طيب ..

كل سنة وربنا راضي عننا وواهبنا نعمه اللي ماتتعدش :)

19 فضفضوا:

غير معرف يقول...

عندما تسعى إلى تحقيق أسطورتك الذاتية فإن الكون كله يتآمر معك لتحقيقها

مهرة سالم يقول...

السلام عليكم...
بالفعل هنالك أشياء تحدث لك وحدك هي هبه و هديه ربانيه...
........
كل عام وأنتي بخير..

Unknown يقول...

لا أنا بصراحة أول مرة أتكعبل في المدونة دي وشكلي هأشبك فيها مش هسيبها ليه بأه هو كده عجبتني ممكن ولا أروح من غير مطرود وخلاص
مودتي

إبـراهيم ... يقول...

حـــلووووة قوووووي


أول مرور ليَّا هنا، بس شكله مش هيبقى الأخير


ياااارب كل أيامك سعادة وهنــــا

mohamed talaat يقول...

عاجبني اوي التفاؤل اللي عندك..و ان حاجات صغيرة ممكن ماحدش ياخد باله منها..انتي بتشوفي الجمال اللي فيها..
ربنا يوفقك و يسعدك دايما

alshared يقول...

أكيد التفاصيل الصغيره مهمه جدا

رائع الأحساس الايجابي الموجود في التدوينه دي


أسلوب الحكي بسيط

والبساطه دوما رداء الرائعين


مصافحه أولي لحرفك

دمتي بكل الود

كأنني أنا يقول...

غير المعرف:

أحيانًا فقط..

ليت كويلهو كان صادقاً.. وليت الأمر ببساطة تحويل الصخر الى ذهب!!

كأنني أنا يقول...

M.K:

وانتِ طيبة يا حبيبتي
نورتيني بجد ونورتي فراشتي..

دي كمان هدية حبيتها:))

كأنني أنا يقول...

كاتب مصري:

D:
لالالالالا...

طبعا ممكن .. ده شيء يشرفنا D:

نورتنا زيارتك يا فندم:)

كأنني أنا يقول...

إبراهيم ... معايا:

يارب ما يكونش الأخير .. ويارب أيامنا كلنا تكون مليانة خير وفرح وسعادة ورضا :))

كأنني أنا يقول...

mohammed talaat:

ربنا يكرمك يارب :))

الغريب بقى ان الحاجات دي أنا ما حسيتش لحظة انها صغيرة..
الأغرب كمان إني أقنعت كل اللي حواليا بده .. وأقنعتهم كمان انها لي أنا تحديدًا.. تلاكيك يعني D:


شرفني مرورك وفرحني جدًا:)

كأنني أنا يقول...

الشارد:

بجد بجد فخورة ومبسوطة جدا برأي حضرتك:))

مصافحتك الأولى لكلماتي .. أسعدتني بشدة.

غير معرف يقول...

كأنني أنا..
انا مبتسمة و مش عارفة ابطل.. و ياريتني افضل مبتسمة كده على طول لو كلماتك الرقيقة هتعمل كده فيا كل ما اقراها.. :):)
كل سنة و انت طيبة و يا رب ايامك كلها تبقى بنفس النقاء ده و نفس النور ده و نفس الصفاء الداخلي ده..

غير معرف يقول...

على فكره مش بس الكون لوحده عايزك سعيده ومتفائله كدا على طول.. أنا قبل الكون نفسي أرسم أحلى بسمه في أحلى وجه وربنا يقدرني ..
ويارب زي مالكون بيبتسملك تكوني انتي بسمة الكون ..
وقلتلك مليون مره تحطي صور قوس قزح الحقيقه بس مفيش فايده!
بس اهم حاجه اني شوفتها ويارب تكون حياتك ملونه دايما وقوس قزح بألوانه ينورلك كل أيامك ياأرق ورده في الدنيا..

غير معرف يقول...

على فكره مش بس الكون لوحده عايزك سعيده ومتفائله كدا على طول.. أنا قبل الكون نفسي أرسم أحلى بسمه في أحلى وجه وربنا يقدرني ..
ويارب زي مالكون بيبتسملك تكوني انتي بسمة الكون ..
وقلتلك مليون مره تحطي صور قوس قزح الحقيقه بس مفيش فايده!
بس اهم حاجه اني شوفتها ويارب تكون حياتك ملونه دايما وقوس قزح بألوانه ينورلك كل أيامك ياأرق ورده في الدنيا..

كأنني أنا يقول...

الجميلة ريم:

وانت طيبة يا حبيبتي .. يا رب يستجب لينا كلنا.

أنا بجد فرحانة أوي انك نورتيني ويارب دايما تتبسطي في فراشتي..

أهلا بيكِ يا قمري:)

كأنني أنا يقول...

منمونتي الغير معرفة:

أصلاً أصلاً أصلاً يعني انتِ بس مجرد وجودك في الدنيا كدا جنبي .. هدية كونية جميلة :)


عارفة والله ان انا وحشة ، كان مفروض أحط الصور من زمان والفكرة كانت موجودة بجد، بس والله انا بقى نادر لما بادخل من الجهاز.. انتِ عارفة المأساة يابنتي! D:

تسلم لي ايديكِ يا منمونة وتسلم لي كلماتك وحروفك ويسلم لي قلبك المنور دايما ده :))

Ahmed Hishmat يقول...

كلامك حلو قوي
وجميل جدا
.........
تحياتي لذوقك
ممكن تنوريني شوية
هبقى سعيد جدا

كأنني أنا يقول...

ربنا يخليك يا فندم..

أنا بجد يشرفني أزور مدونتك.. أتوقع فيها خيرا كثيرا..

دقيقة وأكون هناك :)