٢٨ أكتوبر، ٢٠٠٨

لخبطة ملونة

انهارده كان يوم جميل أوي .. :)

عادة انا دايما فرحانة ومبسوطة ومتفائلة عشان كدا كل اللي كان بيشوفني انهارده كان بيسألني

مالك ؟

فيكِ حاجة؟

حد مزعلك؟

انتِ مش شكلك ليه ؟

بس أنا فعلاً فعلاً كنت مبسوطة.

هما اللي مش عارفين..

********************

امبارح صاحبتي قالتلي فكرة جميلة جدا حبيت انها تنتشر وماتقفش عند دفعتي أو كليتي أو حتى جامعتي بس..

الفكرة هي ان كل واحد يدفع جنيه كل أسبوع أو كل شهر حتى ..

تخيلوا .. مبلغ صغير جدا جدا .. بس لما نكون ناس كتير متجمعين على خير

ربنا هيعينا و يساعدنا والمبلغ ده هيتحول لحاجة كبيرة على المدى البعيد..

في المعاد اللي احنا نتفق عليه هنلاقي ان احنا اتجمع عندنا مبلغ محترم نقدر نساعد بيه من يستحق..

سواء بقى من يستحق ده مستشفى.. دار أيتام .. شنط رمضان... كدا يعني.

,واحدة صاحبتي تانية بقى كانت قالت لنا على الحكاية دي من كام اسبوع كدا وحسبناها لو احنا 40 (يعني سكشن واحد بس)

وكل واحد فينا دفع جنيه كل اسبوع يعني على رمضان الجاي ان شاء الله هيكون معانا حوالي 1900 جنيه..

هي أه مش حاجة كبيره أوي بالنسبة للأوضاع اللي احنا فيها.. بس نعتبرها (نواية تسند الزير D: )

وفي الأول وفي الأخر..

الله المستعان :)

************************

عايزة أعتذر لكل حد دخل فراشتي وحس انه متضايق بأي شكل من الأشكال ..

أنا نفسي بقيت كل مادخلها قلبي بيتقبض كدا وأخاف جدا D:

المدونة بجد ضلمة أوووي وقالبة على كآبة بشكل مش طبيعي.

************************

ممكن يكون الكلام الملخبط اللي فوق ده مالوش دعوه ببعضه ..

بس ممكن جدا يكون مشترك في نقطة واحدة

أو

حد واحد... ;)

أنا فخورة بجد ان انتِ في حياتي يا بونبوناية.

18 فضفضوا:

دعـاء عـلى يقول...

الحاجات الملخبطه دى عند كل واحد و ساعات فعلا ما بتنفعش معاها محاولات الترتيب ...
هرد عليكى لخبطيطايه لخبطيطايه (:
* كويس انك مبسوطه ... خليكى كده بقه علطول
* الفكره جميله جدا بس محتاجه ناس يدعموها بجد و يفضلوا متابعينها مش يتحمسوا فى الأول و بعدين حماسهم يفتر لان ده اللى بيحصل عموما ... ربنا يوفقكم
* ربنا يبعدك عن الكآبه يا جميل بس معلش اعتبرى الحياه فترات و دى الفتره الكئيبه بتاعتك (:
المهم فى الموضوع انها بتاعتك انتى ...
* الكلام اللى فوق اللى يجمعه انه اللخبطه بتاعتك انتى و دى لوحدها حاجه حلوه ... ربنا يخليلك بونبونتك (:

غير معرف يقول...

دائما منذ عرفتك افخر بكي،أحبك ، أحترمك، اشعر بعاطفه غريبه تجاهك، يبدو انني ارى بكي شيئا افتقده.. او أبحث عنه أو ربما اتمناه. لديك رقه ورودك وجمال فراشاتك لم استغرب يوما حبكي لها .. ولا استغرب ايضا حبها لكي.. لا أعلم ولكني لم أشعر حقا بسعادتك وانتي تخطين هذه السطور يبدو انها سعاده" متلخبطه" اتت في وقت ليس بوقتها.. يبدو انك سعيده ولست سعيده في الوقت ذاته.. ربما تفكرين تتأملين تضحكين وتبكين ولكنها فتره ستمضي وتغيب وسريعا سأرى ابتسامه صافيه وسعاده صادقه .. تشعين كما كنتي دائما بوجه ملائكي وقلب يملأه حب عذري..
شكرا لنشرك تلك الفكره في مدونتك شكرا لتذكرك لها شكرا لرقه قلبك ولدعمك لها ..
فراشتي ... دائما وابدا اتمنى لكي سعاده ابديه ليست دنياويه فقط بل وأخراويه.. أحبك في الله وأحب تدوينتك الرائعه.. لا تهتمي بالألوان فمن يعرفك .. يكفيه ان يرى وجهك طيفا في خياله .. تقرأين عليه كلماتك عندها سيعرف معنى ان يكون للألوان جمال ..
اتمنى عليكي فقط ان تظلي كما انت دائما ..عذبه .. رقيقه..
مضمونا وصوره
من: بونبونتك؛)
‏"انتي عارفه اني مبحبش اكتب عالموبايل لانه متعب جدا.. بس لو عشانك.. اعمل اي حاجه" :)

romansy يقول...

لا ابدا مش زعل ولا حاجه فراشتك جميله ومنوره دايما طول ماانتى بتكتبى فيها
الله ينور عليكى
بس والله فكره
وفعلا مبلغ بسيط بس ممكن يجمع لنا كتير

عايش علي الهامش يقول...

لحظات من الشجن .... من قال ان الشجن اكتئاب كلنا نعشق الشجن

قديما قالوا ان اكثر مشاعر الدنيا صدقا هي الحزن ...حتي الممثلون لايبكون بصدق الا ان كانوا حزنين فعلا ...

لما ذا تعتبري اذا كلماتك سيئه حتي وان كانت حزينه مادامت صادقه .........كل الكلمات الصادقه حتي وان كانت من الشجن تسعد من يقراها لانه يري نفسه فيها في احرفها

شكرا لك

كأنني أنا يقول...

دعاء على:

* يارب بس أنا مش عايزة أبقى مبسوطة من جوه بس أو من بره بس.. عشان كدا مش عايزة أخليني كدا على طول D:

* أمين يا رب العالمين، الفكرة مسيطرة علينا كلنا بشكل مش عادي فيارب الحماس ده ما يقلش..
بس عارفة يا دعاء؟
أنا أول كلمة قلتها لصاحبتي دي هي ابقي فكريني على طول.. حتى لو جا اسبوع وانا ماجيتش ليكي انتِ تعالي فكريني عشان انا نساية D:
مش عارفة بس أنا متفائلة بجد بالموضوع ده..

* ربنا يخليكِ ليا يا قمري ..
آه آه مظبوط.. دي فترتي الكئيبة وانا باحبها D:

انا بس ماحبيتش فترتي الكئيبة تضايق حد :)

* ويخليكِ ليا بجد عشان أنا باتبسط كل ما اشوف اسمك عندي أو عندك

أنا فرحانة جدًا جدًا انك منوراني يا جميل :)

كأنني أنا يقول...

منمووون:

* (@#%$*^&) <---- وش مكسوف جدًا زي بتاع محاضرة الباثولوجي كدا ههههههههه

ايه يا بنتي الكلام الجميل دا كله ؟!
انتِ عارفة كويس ان أنا اللي حاسة بكل اللي انتِ قلتيه ده.. بس أنا بقى معايا حق فيه D:
ربنا ما يحرمني منك أبدا يا حبيبتي :)

* أنا سألتك السؤال ولسة مش عارفة الاجابة:
في الكلية فيه وش وملامح ونبرة صوت تعرفي منها جوه فيه إيه..

على المدونة بقى .. ايه خلاكِ تحسي ان سعادتي ملخبطة أو مش في وقتها ؟!!

لما أقول مبسوطة يبقى مبسوطة بطلي تعرفي كل حاجة كدا ؛)

* شكرا ليكِ انت يا بونبونايتي عشان شاركتيني الفكرة و كنتِ حابة تسمعي رأيي فيها :)

* برده بتقولي كلام كتير انا مش قده ..
ربنا يكرمك ويبارك فيكِ يا قمري
وربنا يديم المحبة اللي بينا فيه :)

مش قادرة أوصفلك سعادتي بردك ده..
هافضل دايما مستنياكِ تنوريلي فراشتي

كأنني أنا يقول...

romansy:

وينور عليكِ يا رب..
بجد ارتحت ان مافيش زعل :)
يــارب دايمــا.

وارتحت كمان ان الفكرة عجبتك ..

سعيدة جدا بمتابعة حضرتك :)

كأنني أنا يقول...

عايش على الهامش:

"قديما قالوا ان اكثر مشاعر الدنيا صدقا هي الحزن .."

ماكنتش مصدقة المقولة دي بجد وباحاول ماصدقهاش .. بس مش عارفه :)

أنا باحس ساعات ان لو واحد لقى نفسه في أحرف من الشجن .. إذا على حياته السلام.

عشان كدا خفت كلامي يوجع أي حد..

زيارة أولى مؤثرة جدا:)
مرحبا بك يا فندم في فراشتي

غير معرف يقول...

"كل مالا تبلغه يداك الصغيرتان ملك يديك الصغيرتين إذا أتقنت التدوين بلا أخطاء. من يكتب شيئا يملكه. ستشتم رائحة الوردة من حرف التاء المربوطة كبرعم يتفتح، وستتذوق طعم التوت من جهتين: من التاء المتصلة ومن التاء المفتوحة كراحة اليد.
الحروف أمامك،فخذها من حيادها والعب معها كالفاتح في هذيان الكون.الحروف قلقة، جائعة إلى صورة، والصورة عطشى إلى معنى....حك حرفا بحرف تولد نجمة، قرب حرفا من حرف تسمع صوت المطر......كل الحروف جاهزة لاستقبال الشكل....ما عليك إلا أن تسمي بيدك كائنات تعرفها من قبل، وكائنات تعرفك على نفسها فيما بعد."
درويش_في حضرة الغياب

أفسحت المكان لكلمات أيقونتي الأجمل محمود درويش ليقول لك...فلتبوحي كما تشائين.فلتكن الكلمات مبعثرة فوضوية حوشية.. فلتكن كما تريد .. اتركيها تخرج كما يتراءى لها، ولعل جمالها في تناثرها كغابة استوائية
دائما مايكون الفرح غجريا والسعادة حوشية..فاتركيهما يرسمان شكل الكلمات مثلهما
أشعر في كلماتك ذلك الإحساس الذي يأتيني عندما أكون سعيدا... أشعر وكأنني أرغب في معانقة الكون...أرى بياضه ووروده وخضرته وطيوره وفراشاته مثل عوالم سحرية
دامت سعادتك أبدا
:D

normalgirl يقول...

اصل انتي مش متخيله حجم الهيصه والانشراح والانبساط اللي بتخلي كل حد يلمحك حتى يحس بيه:D
فلما الهيصه دي بتقل فسفوسه حتى
الناس بتحس ان في حاجه غلط
زي ساحب الضوء بتاع رون كده فاكره:D
عجبتني الفكره جدا بجد ولو اتنفذت معاكو باذن الله

Unknown يقول...

مباردة طيبة جدا جدا يا فراشة :)
يا ريت الفكرة تنتشر.. فعلا هيكون في فرق كبير..
لو اي مكان ف يتجمع بشري يكون فيه طريقة لجمع جنيه كل شهر من كل الناس ..
تخيلي .. الخير هيبقى كتير قد ايه :)
فعلاً..
الله المستعان .
عسى الله ان يؤلف بين قلوب الناس في الخير .

blue-wave يقول...

حلوة الفكرة
بجد ربنا يكرمك
ويخليلك بونبونايتك:))

كأنني أنا يقول...

غير المعرف:

وسعادتك سيدي :)

كسب درويش بتلك الكلمات فائق اعجابي.. وعن جدارة.

"أشعر وكأنني أرغب في معانقة الكون...أرى بياضه ووروده وخضرته وطيوره وفراشاته مثل عوالم سحرية"

وانا وانا.. :)

نورت فراشتي.

كأنني أنا يقول...

normal girl:

أه أه فاكراه هههههه

ربنا يحليكِ ليا يا سمسمتي..

والله انتِ اللي وجودك منور لي حياتي

هيصتي ( سعادتي ) مش هاتقل سنتوفة واحدة طول مانتِ معايا :)

دمتِ بقلبي

كأنني أنا يقول...

قهوة بالفانيليا:

ايه ده ؟؟!!

دا بجد بجد ؟؟؟

أستاذتي شيماء علي منورالي فراشتي!!

أهلا بيكِ بجد


ربنا يجمع المسلمين على الخير يارب..

همتك معانا بقى :)

سعيييييييييدة جدا بزيارتك

كأنني أنا يقول...

blue-wave:

ويكرمك يارب :)

الحمد لله ان الفكرة عجبتك..

ربنا يعينا وننفذها يارب :)

نورتني بزيارة حضرتك.

حمامة يقول...

مفيش احلى من الحاجات الملخبطة التلقائية لأنها طالعة من القلب

ربنا يخليكوا لبعض يارب
وربنا يعينكم يارب ويقدرنى واقدر اساعدكم

:)

كأنني أنا يقول...

ربنا يخليكي انت لينا يا حمامة

وجودك فرحني جدا فعلا